長毛大戰元秋　邊個最勁揪

[youtube]At-rjCkW_y4[/youtube]

【本報訊】有「立法會元秋」之稱的民建聯議員蔣麗芸，早前死撐大話特首梁振英後，昨日又在社民連「長毛」梁國雄，提問有關「梁粉」張震遠的誠信問題時插嘴，公開要求梁國雄「收聲」。長毛隨即與元秋隔空互轟近三分鐘，其間蔣斥責梁「發神經」，梁反指蔣「發大小姐雌威」。

插嘴維護陳茂波張震遠
長毛昨日在發展事務委員會會議上，質疑發展局局長陳茂波，讓屢惹爭議的市建局主席、梁粉張震遠跟進房屋問題，做法令人「心驚」，此時蔣麗芸突然高聲插嘴，與長毛展開罵戰，節錄如下：
蔣：蔣麗芸　　梁：梁國雄
蔣：（向委員會主席劉皇發說）佢（長毛）唔係講緊有關文件嘅嘢！
梁：（表現意外，反問蔣）你睇晒（會議）文件未？
蔣：（拒絕回應，再向劉皇發說）假如佢（長毛）唔係講緊會議上嘅嘢，請你（劉皇發）叫佢收聲！
梁：（聽到「收聲」兩字後再難抑怒火，怒斥蔣）你邊位呀？你𠵱家返去蔣家，搵個妹仔畀你管啦，大小姐！我容忍你，唔係容忍一世㗎！
蔣：（忽然發難，向梁高喊）收聲！收聲！（隨即「指導」劉皇發）主席，請你跟議事規則做嘢！
梁：（聞言後更激動，質問蔣麗芸）張震遠係你邊位呀？我講張震遠關你乜事呀？我問局長責關你乜事？你係咪儍㗎？儍嘅就去睇醫生！
「功能組別有冇儍人界別」
劉皇發此時試圖打圓場，指擔心會議不能及時結束，但梁國雄及蔣麗芸未見收火，繼續隔空互轟。梁批評蔣「發大小姐雌威」，又問蔣「功能組別有冇個叫儍人嘅界別？」恥笑蔣表現失控，蔣反斥梁「發神經」。最終在劉皇發力促兩人冷靜下，蔣麗芸才收口，梁則繼續向陳茂波發問。
蘋民洗版
Alfred Ling
罵得好，罵得妙。此婆娘真不知所謂，只懂得奉承權貴，豬狗不如。

Eddie Chui
論嗌交蔣大小姐真係不自量力，自討沒趣。長毛擺明是利用吵鬧、譁眾文化入局。你叫佢收聲，佢嘅政治本錢咪破產！儍！有政治常識都唔會咁做。

Jack Leung
真係唔明，大企業家蔣氏大家族會生得出這個如此不知所云嘅女兒！她的妹妹麗萍雖然不算唱歌唱得好好聽，但是都算是係個人！佢這個家姐真係要幾衰有幾衰！請快快下台返屋企吧啦！

Kin Ng
為689當眾出醜，值得咩？元秋！

Edwin Ho
個蔣麗芸淨係識插嘴，議員問局長嘢即刻搭嗲，又要大聲嘈，幫局長唔使幫得咁出面，淨係識叫人收聲，希望下屆立法會冇佢喺度！

Kathy Liu
爛佬vs潑婦，點解唔動武？

Tszhong J. Lam
兩個鬥癲。

Mike Cheung
長毛大聲，次次都入得返立會，因為有理；你票后咁樣罵街，下年你哋要派幾多噸嘢先可以拉得返啲票？加油，繼續鬧啦，下屆真係唔想見到蔣小姐。

Samme Tsui
選大小姐啲選民，醒未？

[img]http://static.apple.nextmedia.com/images/apple-photos/apple/20130123/large/img0000066_a02.gif[/img]

來源:[url]http://hk.apple.nextmedia.com/news/art/20130123/18143784[/url]